Vepsän kirjkelen kursad mäneba Podporožjes
Elokun 15.—28. päivil Piterin agjan organizacii ”Vepsän kond” tegeb vepsän kirjkelen kursid lapsiden i aigvoččiden täht. Opendusen lopus kaik ühtnikad saškaba sertifikatoid. Kursad mäneba Podporožjes. Ned oma maksutomad, niile voiba tulda kaik tahtnikod, ked tahtoiba opeta vepsän kel’t i tundištadas vepsän rahvahan tradicijoidenke da kul’turanke.
— Kursiden aigan openikoiden täht tehtas matkoid vepsläižihe külihe, ozutesikš, Vidlaha, Vil’halaha, Järvenkülähä, miše tundištoitta ühtnikoid vepsän elonke, tradicionaližiden käziradoidenke, veroidenke da kul’turanke, mi abutab popul’arizoitta kodikel’t, sanub projektan sädai Ol’ga N’uman.
Kursad om oigetud sihe, miše paremboitta vepsän kelen tedoid da mahtoid ristituil, ked jo aigemba openziba vepsän kel’t, a mugažo niil, ked vaiše zavodiba tundištadas kel’enke. Mugoižed matkad vepsläižidme külidme abutaba vahvištoitta paginkel’t pagištes küliden eläjidenke.
Kursad mäneba “Vepsän pert’: ühtes voim kaiken”-projektan aigan Piterin agjan Gubernatoran Grantan tugele.
Uzištoid neciš temas voib lugeda mugažo venäks.
