Vepsän kelen nedal’ mäneb Karjalan Taidehmuzejas-ki
Karjalan da vepsän kirjkelen päiväks om tehtud kaks’ videorolikad karjalan da vepsän kelil. Ned tehtihe ”Lingua-muzei”-projektan mödhe Karjalan Taidehmuzejas. ”Lingua-muzei”-projektan aigan tehtas videorolikad kul’turan da muzejan kal’huden polhe neniden rahavahiden täht, kudambad eläba Karjalas da tuliba Karjalaha toižiš maišpäi.
― Projektan tegijad tahtoiba starinoita muzejan polhe erazvuiččil kelil, miččiden keskes om karjalan da vepsän keled, gruzian kel’, armenian kel’, azerbaidžanan kel’. Mugažo projektan aigan tehtas audio-ozuteluz videl kelel kaikenaigaližen muzejan ozutelusen pohjal. Se znamoičeb, miše vepsläižed, kudambad tuleba muzejaha voiba kundelta kuviden da pirdajiden polhe vepsän kelel. Nügüd’ audio-ozuteluz kirjutadas änenstudijas, sanub Taidehmuzejan radnik Julia Aprodu.
Kacta rolikad voib Karjalan Taidehmuzejan VKontakte-lehtpolel. ”Lingua-muzei”-projekt om ”Karjalan valdkundan pämehen grantad”-konkursan vägestai vodel 2022. Projekt lopiše 2022. voden kül’mkus.
