Vepsän kelen kursad zavodisoiš
Jo tulijas nedališpäi Karjalaižiden, vepsläižiden da suomalaižiden mediakeskuses zavodisoiš vepsän kelen kursad. Ezmäine vastuz, kus diskutiruidas uroikoiden aigmär, mäneb necin sobatan 11:00.
Johtutam, miše vepsän kelen kursad zavottihe vedäda Mediakeskuses männudel vodel. Tahtnikoid opeta kel’t oli äi.
– Täl vodel mö jatktam meiden radod jo kahtes gruppas. Ezmäižes linneba openikad, kudambad jo tedaba vepsän kel’t, toižes – ned, ked vaiše zavodiba sidä opeta, sanub kursiden vedäi Maria Šašina.
Om tetab, miše nügüdeks aigaks kursile kirjutihe jo läz 10 mest – mi om hüvä lugumär vepsän rahvahan täht.
Vepsän kelen kursad täl vodel avaitas Karjalan Änižröunan rajonas-ki. Šokšus, Šoutjarves da Kalages keratas tahtnikoid opeta kodikel’t.
– Nene kursad tehtas Vepsän kul’tursebran ”Elomatk läbi aigas” – projektan aigan Rahvahaližen da regionaližen politikan ministerstvan abul. Ned pidätas aigvoččiden ristituiden täht, starinoičeb Vepsän kul’tursebran pämez’ Larisa Čirkova.
