Venäjän kanšojen muamonkielien opaštajat piettih I Kerähmö
Opaštajat keräyvyttih, jotta järještyä perušta muamonkielien ta kirjallisuon alan tietomiehien ta opaštajien voimien yhistämisekši šekä jotta parentua kanšalliskielien, kirjallisuon ta kulttuurin opaštamista Venäjällä ta noštua mainittujen oppiainehien statussie.
Kerähmöh ošallistu yli 280 ihmistä 75 alovehelta: koulujen, opistojen ta yliopistojen opaštajat, opaštamisen metodistit, opaššukšen ohjamisen ruatajat ta opaššušlaitokšien johtajat.
Kerähmön aikana hyväkšyttih opaštamisen kehitykšen šuunnitelmie šiitä, jotta pitäy parentua Venäjän lakija opaštamisen alalla, valita keinoja, mitein toteuttua muamon kielen ta kirjallisuon ta muamon kielen ta kotiluku -opaššušohjelmie, miärätä šiäntöjä ta šuuntoja, kumpasien mukah kehittyä opaššušohjelmie ta oppikirjoja, koroštua kanšallisien kielien omaperäisyön ta ainutluatuisuon nykyseššä monikulttuurisešša muailmašša.
‒ Kerähmöššä mie kerroin šiitä, mi on monikulttuurini tila ta mitein luatie šen avulla kielienopaššušympäristyö. Kerähmöššä myö valmistima piätökšet ta olemma yhtä mieltä šiitä, jotta niijen joka pykälä on tärkie, šano šuomelais-ugrilaisen koulun karjalan ta šuomen kielien opaštaja Jelena Pankratjeva.
Kerähmön ošallistujat piätettih, jotta iellähki pitäy ratkaissa opaššušmaterialien miärän ta kunnon kyšymykšie, noštua muamonkielien opaštajan arvuo, ruatua šuamisekši enämpi rahatušta muamonkielellä pitäjillä tilaisukšilla.
Lopušša oli piätetty julkaissa Kerähmöššä luvettuja šeloššukšie tieto-käyttänöllisien artikkelien kokomukšena.
