Ozuteluz avaidab kacujile veden mirud da ozutab sen sur’t znamoičendad ristitun elos. Ozutelusel voib nägištada kalanikan püdusid: verkod da neglad niiden kudondan täht, kibrikod, azrag da äi tošt. Kacujile om ezitadud Sur’ Vodlojärven laiv, miččen om tehnu vodel 2008 mastar’ Anatolii Titov.
— Mö olem valičenuded enamb 80 predmetad meiden fondoišpäi, erasid niišpäi mö ozutam ezmäižel kerdal. Ned ozutaba mehen elod vedenno amuižes aigaspäi nügüdehesai, sanub ozutelusen ohjandai Marina Babalik.
Enččiden predmetoiden rindal om ezitadud fotokuvad. Niiš om ristitun kaceg veden miruhu. Fotod oliba tehnuded Petroskoin fototegijad da pirdajad. Kaik ned ozutaba veden čomut da johtutaba ristituile, mitte se om tärged ristitun elos.
— Nece ozuteluz ozutab, ei vaiše kalatest. Se ozutab, mitte om čoma meiden mail’m. Järviden puhthuz’ om lujas tärged azj. Niid pidab kaita. Mö, muzejan ranikad, kaičem eksponatoid. Muga-ki pidab kaita meiden londust, sanub Kiži-muzejan varapämez’ Ol’ga Žarinova.
Ozuteluz radaškandeb voden lophusai. Kiži-muzei varastab adivoid.