Vastuz fotografanke Ilja Timinanke mäni Kalages
Mastar’-klassad fotokuvan mödhe tetaban fotografanke Ilja Timinanke jatktase. Necil kerdal Ilja oleskeli Kalagen školas. Melentartuz’ fotoho lapsil om mugoine sur’, miše mastar’-klassaha ühtniba kaik 5.-9. klassoiden openikad.
Ilja tegeb äi melentartuižid, čomid kuvid da videoid dronoiden abul. Openikoile hän ozuti ičeze radoid, starinoiči sändoiden polhe da mahtoiš fotoiden da videoiden tegemižen aigan sidä kesken kamerale da smartfonale. Hö ühtes kacuiba erazvuiččid azjoid, konz dronad voiba tehta pahut ristituile vai živatoile. Nene oliba lujas tarbhaižed tedod neniden openikoid täht, kel oma dronad. Ved’ rata niidenke om lujas vastusenpidäi azj.
— Vastusel tedištin, kut pidab pästta dron zakonan mödhe. Ilja openzi meid tehmaha fotokuvid čomin i oikti. Lujas melentartuine i tarbhaine vastuz oli, sanub 5. klassan openik Jan Lebedev.
— Meletam ostta dron. Tahtoin tarkištelda živatoid, nece azj om lujas melentartušt minei. Dronan lendandkorktuz’ andab voimusen tehta čomid londuzkuvid, sanub 8. kalssan openik Valera Klimšin
Konz lekcii fotokuvan mödhe lopihe, lapsed läksiba tehmaha sädaitegendad i lujas holduiba, konz polestiba ičeze radoid. Vastuz tuli mel’he kut openikoile, muga opendajile-ki. Kaikutte oti ičeze täht midä-se ut da tarbhašt mastar’-klassan aigan.
Johtutam, Fotostudii lapsiden täht radab Vepsän kul’tursebran ”Kel’ — minun Kodima”-projektan abul da Karjalan pämehen grantoiden fondan tugel.
