Anuksen käzineruo: Vahnu da uuzi rinnakkai
Ozuttelu on valmistettu Muzeiloin marafounu: Karjalan käzinerot – suuren projektan hantuzis. Projektu yhtistäy Karjalan neroniekkoi. Anuksen čupul projektan välituloksekse rodih Anuksen käzineruo – mennyös aijas tulieh -ozuttelu. Se valmistettih Anuksen viizi nerokastu muasterii: Julija Žuravl’ova, Roman Leontjev, Tatjana Jušina, Jelena Skobkina da Irina Tikkujeva da Anuksen muzei. Ozuttelus suau nähtä sidä, midä aigoinah maltettih ruadua anukselazet: kudomistu da saviluajilmustu: astieloi, sobii, hurstiloi, käzipaikkoi da muudu.
– Enne ozuttelun avajazii meijän neroniekat opastettih eri neroloi rahvastu, hyö käydih tutkimah perindöllizii neroloi Alavozeh. Kiitämmö Alavozen muasteriloi, hyö otettih vastah neroniekkoi, kuduat syvät tutkittih kuvondan histouriedu da paikallizien eläjien perehien perindölöi. Tämä projektu on yhtistännyh seiččie muzeidu. Suurembi yhtehine ozuttelu rodieu myöhembi Kižin muzeis, projektan tuloksekse roitah sežo seminuaru da kniigaine Karjalan rahvahien käzinerolois, sanoi Anuksen kanzallizen muzein johtai Irina Romanova ozuttelun avajazis.
Ozuttelu on tozi mieldykiinittäi: vahnan ezinehen rinnal näet uvven, sanommo, Ojatin muasteriloin lujittu XIX-luvun lopus luajittu kukšin da rinnal anukselazet Roman Leontjevan luajitut saviastiet.
– Minuh niškoi on tärgei ozuttua sidä čomuttu, mittumua rahvas luajittih enne da kui se hyvin pädöy eläjes nygöi, sanou neroniekku Julija Žuravl’ova.
Ozuttelu rubieu ruadamah ligakuun 17. päivässäh. Lapsile da školan opastujile kačottavakse ozutteluh sijoitettihgi vahnu ombelusmašin da kangaspuut. Paiči ozutteluu Anuksen nuoret kävvähgi kuvondupajah.
