Uzʾ vepsänkeline Kipinä-kulehtesen nomer varastab ičeze lugijoid
Täl vodel meiden kulehtesele täudub 35 vot. Kipinän jubilejaks Galina Baburova pagiži kulehtesen pätoimitajanke Jana Filimonkovanke. Necidä čomad paginad tö voit lugeda udes nomeras.
Sügüzʾ om parahim aig mända mecha marjoihe da senʾhe. Vepsläižid paksus kuctas mecrahvahaks. Olʾga Žukova kirjuti, miččed marjad da babukad kazvaba mecas da miččed kalud voiba abutada meile.
Jevgenia Sinickaja Piterišpäi jatktab ičeze sarnoiden ciklad kahtes sizares, kudambad mänetaba aigad babanno küläs. Midä tegihe heidenke täl kerdal – tedištat iče. Kipinä-kulehtesen lehtpolil voib lugeda Natalja Silakovan starinoid-ki. Natalja starinoičeb vepsläižiš tradicijoiš, hengiš da vepsän rahvahan elos starinoiden kalʾt. Natalja Silakovan starinad oma mel’he kut lapsile, muga aigvoččile-ki ristituile.
Hämähoukmezʾ, Supermen, Halk, Tor – mitte heng om sinun armaz supermezʾ? Ked oma supermehed da mitte vägi heil om, lugem ühtes täs nomeras.
Lehtesen ozutim kirjan täht om lujas tarbhaine azj školas da kodiš. Tahtoid-ik tehta sen iče? Mö abutaškandem sinei. Avaida Kipinä-kulehtez da tege se ičeiž käzil.
Teiden ičetoi lehtpolil möst om melentartuine starin. Täl kedal hüvä prihaine Izrailʾaspäi kirjuti popugajiden polhe, kudambad eläba hänenke.
— Täl kerdal meiden nomeras mö vaumičem urokoiden aigmäran openikoiden täht. Sen voib riputada seinäha da kävutada kogonaižen voden. Mugažo žurnalas om lujas äi melentartuižid tegendoid, kebnad kodvusid da mastarʾ-klassoid, sanub Kipinän pätoimitai Jana Filimonkova.
