Uz’ mobiline ližaduz kebnenzoitab karjalan da vepsän keliden opendamišt
“Oma kieli” -mobiline ližaduz om jo vaumiž. Se linneb tarbhaižen abunikan niile, ked opandaškadeba karjalan da vepsän kelid. Uden mobiližen ližadusen abul voib opeta uzid sanoid da kodvda sadud tedoid harjoitusiš.
— Nügüdläižile mehile tarbiž oma nügüdläižed keliden opendamižen formatad. Mö kaiken ecim niid. Muloi mö tundištimoiš neniden programmistoidenke, kudambad tegiba necen mobiližen ližadusen. Meiden melentartused, tahtod da voimused ühtenzoitihe, sanub “Periodikan” pämez’ Natalja Sinickaja.
Mobiližen ližadusen tegijad oma Feliks Jas’uk da Jevgenii Ustinov. Kuviden avtor om Dmitrii Dmitrijev. Materialad keliden opendamižen täht vaumičiba “Periodika” -painišton radnikad. Heil amu jo oli idei tehta mugoine mobiline ližaduz, täl vodel nece idei tuli eloho.
Sada “Oma kieli” -ližaduz voib kaikutte tahtnik. Se om maksutoi. “Periodikas” usktas, miše se om melentartušt kut zavodijoile opeta karjalan da vepsän kelid, muga neniden keliden tundijoile-ki. Ved’ ezmäižil mobiline ližaduz voib sündutada tahtod edembaižehe kelen opendamižehe, a toižed voiba kävutada se iloks vai, voib olda, vigoiden tarkištelendaks. Tulijal aigal “Oma kieli” planuitas kehitoitta da täutta udel materialal. Mobiližiden ližadusiden internetlaukas jo ozaižihe ezmäižed kävutajiden arvostelused.
Mobiline ližadus om tehtud rahvahaližen da regionaližen politikan ministerstvan rahatugel.
Uzištoid neciš temas voib lugeda mugažo karjalaks, suomeks da venäks.
