Uuzi “Taival” tazavallan 100-vuozipäiväkse
Karjalan tazavallan 100-vuozipäivy on tämän 2020 vuvven tärgielöi pidoloi. Sada vuottu tagaperin oli perustettu Karjalan ruadokommuunu. Karjalazet oldih sen nimenandajannu kanzannu, kui iellehpäi ollah tazavallangi. Meijän rahvastu eli nämmil mualoil monii sadoi vuozii. Hyö ollah tämän muan kandurahvahannu oman histourien, kielen, rikkahan da ainavoluaduzen kul’tuuran da perindölöinke. Paginua niilöis rodieugi al’manuahan enzisivulois. Martti Penttonen, Ol’ga Karlova, Natalja Mihailova, Valentina Karakina ollah kirjutettu tarkat da syvät kirjutukset sih nähte.
Voiton 75-vuozipäivygi – segi on tämän vuvven al’manuahan kirjuttajien huomavokohtannu. Jygielöis voinan vuozis “Taivalah” kirjuttau karjalazen rahvahanrunohuon tutkii, Karjalan tazavallan arvostettu tiedoruavon ruadai Aleksandra Stepanova. Inehmine on iče kestänyh sen jygien aijan. Ičegi Aleksandra Stepanova on tämän vuvven vuozipäivyniekku. Hänel täydyy 90 vuottu. Tutkijan ruado oman rahvahan da kielen hyväkse ei azetu ni kodvazekse. Sit ruavos da Aleksandra Stepanovan elokses “Taivalah” ollah kirjutettu hänen opastujat da kolliegat Valentina Mironova da L’udmila Ivanova.
Uvves al’manuahas lugekkua myös kirjuttajas Ortjo Stepanovas, kuduan roindas tänävuon täytti 100 vuottu, 30-vuodizis vuozipäivyniekois Oma Mua -lehtes da Oma Pajo -horas da äijäs muus.
