Uuzi projektu: ližiä kannatustu erillizeh voinuoperatsieh yhtynyzile
Karjalas on ottanuh allun uuzi projektu ”Voiton ruadopaja”, kuduan tarkoituksinnu ollah omanmuansuvaičuksen opastamine, hengellizien arvoloin lujoittamine da erillizeh voinuoperatsieh yhtynyzien kannattamine.
Uvven projektan piätavoiteh on andua praktiekkuabuu voinuoperatsies olijoile. Projektah tulluot suajah sen aigah uuttu neruo da yhtytäh suureh yhtehizeh ruadoh oman muan hyväkse.
Projektua todevutetah Kanzallizen da alovehellizen poliitiekan ministerstvan, Ystävyskoin da veteruanulaitoksien tuvel. Vuvven loppuh suate projektan todevuttajat peitäh ruadopajoi, kudamih tulluot luajitah erillizes voinuoperatsies olijoile tarvittavii vehkehii.
Enzimäine ruadopaja piettih Petroskois Ystävyskois yhteiskunnallizen volont’ouroin Kalinka-liiton piälikön L’udmila Paramonovan piän al. Ruadopajah tulluzii opastettih luadimah šl’oman piälystehii. Pidoh yhtyttih školaniekat, omatahtozet ruadajat, yhteiskunnallizih liittoloih kuulujat, sego Karjalan urhomiehet -programmah yhtynyh Aleksandr Tikka.
— Mobilizatsien jälles kaksi vuottu sluužin artilleries erillizen voinuoperatsien kohtas, kuni ei ruanittu. Nygöi vähitellen kiännyh rauhuelaigah, Karjalan urhomiehet -programmangi hyvyös. Minä tulin ruadopajah, ku tahtoin kiittiä volont’ouroi, kuduat kannatetah voinuopetasies olijoi, pietäh huodu niilöis. Heijän huolenpido andau lämmiä frontale, lapsien kirjazien da bobazien suaduu rodieu hengele hoivu, kebjiembi on kestiä vaigevuksii. Erähät pietäh kirjazii šižälis, toizet kriepitäh niilöi seinäh dislokatsien kohtas. Bovat ollah rounoku tiedovuot. Minul se oli Čeburaška, kuni minä en kaimannuh sidä pahakse mielekse raneenien aigah, sanoi Aleksandr Tikka Karjalan piämiehen lehtistöpalvelule.
Tänä keviän Artur Parfenčikov andoi allun tazavallan Karjalan urhomiehet -programmale, kuduah yhtynyöt voijah suaja ruadokohtat tärgevimis laitoksis da vallanelimis. Programmu algavui 8. syvyskuudu, projektah jiäviihes 200 erillizes voinuoperatsies olluttu. Programman loppuluvetteloh kirjoile on pandu 30 veteruanua da 15 voinuoperatsies olijua.
Aihies voit lugie suomeksegi.
Yhty Oman Median kanualah Telegramas!
