Kokopäiväni musiikkimarafoni alko yhissetyn kuoron esitykšeštä. Yli 2000 ihmistä tuli Petroskoih, perintehelliseh musiikkipruasniekkah.
- Artistat tultih Petroskoih Komin tašavallašta, Jaroslavlin, Vologdan, Leningradin alovehilta, Moskovašta ta joka Karjalan piiristä. Kaikkieštäh on 80 kuoruo šekä monie šoittajien ryhmie. Tänäpiänä tiälä šuau kuunnella uušie šävelmie šekä tuttuja lempilauluja, šano Kanšantaitehen ta kulttuurialoittehien keškukšen varajohtaja Tatjana Ledn'ova.
Juhlan avajaisissa Karjalan piämieš Artur Parfenčikov tervehti vierahie ta onniteli Venäjän päivällä.
Pitäy panna merkillä, jotta enšimmäistä kertua festivalissa esiinty yhissetty lapšien kuoro, kummaista ohjattih parahien tašavallamme lapšikuorojen ohjuajat.
Valmistelu täh šuureh tapahtumah kešti vuosie, piti kekšie piäidea, valita mimmosie lauluja ta musiikkitevokšie panna ohjelmah.
Lauluja ta tanššija tänäpiänä kuuluu myöhäh iltah šuaten. Kaikki pruasniekkah tulluot ryhmät esiinnytäh eri kentillä ta piälavallaki. Illalla rupieu šoittamah ta laulamah Skylark-ryhmä, a Karjala-tanššiyhtyveh kuččuu kaikkie opaštumah perintehellisie tanššija.