Uuši “Taival” on valmissettu painettavakši
Tämän numeron piäteemana on artikkeli kirjailijašta Juakko Rugojevista. Teema oli valmissettu hänen šyntymäpäiväkši.
— Artikkelissa kerrotah Juakko Rugojevista, kuin kirjailijasta ta niise kuin folklorin keryäjäštä. Šivistynyönä miehenä hiän ymmärti, kuinka šuurta ta pohattua kulttuuriperinnehtä Karjalan rahvaš šäilytti ta lahjotti muailman kulttuurilla. Artikkelin valmisti folklorin tutkija, filologijan tietojen kandidatti Valentina Petrovna Mironova, šelitti Periodika-kuštantamon johtaja, Taival-kirjallisušlehen toimittaja Natalja Sinitskaja.
Vuosi 2023 on ilmotettu opaštajan vuuvvekši, šentäh tämäki teema heijaštuu kirjallisuušleheššä. Taipalen vienankieliseššä ošašša on lehtikuvauš opaštajašta Matti Pirhosešta.
— Taivalta korissetah lisäšivut värikkähien valokuvien kera. Niissä lukija näköy Igor’ Georgijevskin kaunehie kallivopiirrošvalokuvie ta Uljana Tikkasen Šiämjärven kylissä otettuja valokuvie, kumpaset kuvitetah Anastasija Afanasjevan artikkelie Šiämjärven paikannimilöistä, lisäsi Natalja Sinitskaja.
Taival esittäy uušie runoja. Vienakši lukija lukou Sergei Jakovlevin runoja.
Lisäkši on mukava lukie Svetlana Korobeinikovan materialie perehen muistoesineheštä neiččyön venčäštä, korun ta šen omistajien kohtalošta, Aleksandra Stepanovan kirjutušta iänelläitkijäštä Paraskovja Saveljevašta, Raisa Remšujevan muisselmie kanšanrunouven tietäjäštä Aleksandra Stepanovašta, L’udmila Ivanovan artikkelie kylyperintehistä, Valentina Kondratjevan proosua ta Uljana Tikkasen kertomukšie matkuštamisista Karjalua myöten.
Taival-kirjallisušlehti näköy päivänvalon 22. kešäkuuta. Lehen 200 kappalehta voipi oštua Periodika-kuštantamošša. Yhen kuvalehen hinta on 130 rupl’ua.
