Transportan sistiemu luajitah parembakse
Karjalan haldivon istundos Artur Parfenčikov käski luadie transportu helpombah suadavakse. Karjalan piämies vihjai, ku se on tärgei turistoi tazavaldah suajes da paikallizien eläjien komfortakse.
— Täkse vuottu on kačottu Anus-Pitkyrandu, Puudogan piirin Sustreža-jogeh da Dvorčah suate tielöin kohendamine. Junamatkoin suurdu kyzyndiä kezän aigah huomivoh ottajen pidäy suurendua vagonoin lugu Moskovan da Piiterin junis. Enzimäzekse se on tärgei paikallizih eläjih niškoi, sendäh ku kezä on loman aigu da rahvahal pidäy ilmai vaigevuksii ostua liput. Sežo on tärgei kaččuo lendokonehien reisuloin ližävyö, sanoi Karjalan piämies omassah lehtistöpalvelule.
Erikseh Parfenčikov otti paginale ekolougizen turizman kehittämisty. Häi vihjai, ku Karjalas on avattu käyndäkse 146 alovehellistu erikseh kaittavua luonnon alovehtu da 10 kanzallistu puustuo, rauhoitettuu alovehtu da luonnonvardoičusalovehtu federuallizel tazol akkiloittavua. Karjalan piämies käski Luonnonresursoin ministerstvale yhtes erikseh kaittavien luonnonalovehien haldivon kel suurendua kunnostettuloin jalloil käveltävien turistutielöin luguu, ku rahvas voidas hyvin da huolettah tuttavuo luonnon nähtävyksih.
Yhty Oman Median kanualah MAX:as!
