Männuden voden lopus Karjalan termiž-orfografižen komissijan ištundal pagištihe radon planoiš 2022. vodeks. Karjalaižiden da vepsläižiden komissijoiden ühtnikad sanuiba uziden b’ulleteniden tarbhudes, miččihe mülüiži kundaliž-politine leksik.
─ Meil oli jo mugoine kirj kundaliž-politižen leksikanke, mitte paindihe völ kaks’kümne vot tagaze. No aig mäneb, erasiden organizacijoiden nimed jo vajehtihe, kel’ kehitoitase i sihe tuleba uded sanad. ”Kodima”-lehtesen lugijad paksus küzuba meil uziš sanoiš, miččid hö vasttaba lugetes meiden kirjutesid. Siks udištadud b’ulleten’ oliži popul’arine da lujas tarbhaine, sanub Termiž-orfografižen komissijan ühtnik Irina Sotnikova.
Jelena Migunova, Komissijan pämez’, sanui, miše muloi sen radole jagetihe 152 tuhad rubl’ad. Mugoine-žo rahamär anttas necil vodel.
Johtutam, miše Karjalan Termiž-orfografine komissii radab vodelpäi 2003. Männudel vodel Komissijan ühtnikad tegiba valdkundaližiden da municipaližiden organizacijoiden nimiden, erazvuiččiden brošuroiden da tedotuzlaudoiden kändmižid. Mugažo oli keratud karjalan kelen grammatiž-orfografine vajehnik (avtor om T. Boiko), miččihe mülüi enamba 25 000 sanad.