Tedomehed kucuba Karjalan eläjid lugemaha tal’vdujid sorzid
17.—18. vilukud Venäman Linduiden varjoičusen ühtištuz vedäb “Seraja šejka — 2026” -akcijan, miččen aigan lugetas tal’vdujid vezilinduid. Siš tedotadas Venäman tedoakademijan Karjalan tedokeskusen oficialižel lehtpolel. Akcii ozutab, kut vajehtase niiden kezalinduiden, miččed jäba tal’veks lidnoiš i küliš, lugumär da ičtazevedänd.
Karjalan eläjil om voimuz ühtneda neche akcijaha. Kaik andmused voib oigeta vilukun lophusai. Nece kut abutab tedomehile, muga i tundištoitab eläjid heiden regionan vezilinduidenke. Täl vodel akcijan tegijad pakičeba Karjalan rajonoiden eläjid ühtneda linduiden lugemižehe.
— Petroskoin ližaks aktivižesti ühtneba mugažo Olonec da Medvežjegorsk. No toižiš rajonoišpäi mö sam ani vähän andmusid, sanui Andrei Tolstoguzov, akcijan koordinator, Karjalan tedokeskusen Biologijan institutan inžener-oppii.
Miše ühtneda “Seraja šejka — 2026” -akcijaha, tariž vilukun 17. päiväspäi 31. päivähasai tulda sijale, kus om äi vezilinduid, da kirjutada mugoižed andmused: tarkištelendan päivmär, aig da sija; veziuiton nimi; matkan augotiž- da lopsijad; tarkištelendan päivän sä; veziuiton pind; om-ik nece avoin vezi vai jä; erazvuiččiden linduiden roduiden — emiden da ižiden — lugumär; linduiden ičtazevedänd; tarkištelijan personaližed tedod.
Kaik materialad tariž oigeta Andrei Tolstoguzovale elektronižel počtal vai kirjutada hänele “VKontakte”-lehtpolel vk.com/serayasheikakarelia. Ku om taht küzuda Andrei Olegovičal sijaližiš linduiš, ka sidä voib tehta 18. vilukud akcijan aigan: 12:00 časud hän tuleb Pioneroiden organizacijan 50-voččen jubilejan puištoho.
Uzišt neciš temas voib lugeda mugažo suomeks.
Tarkištele "Oma Median" Telegram-kanalad!
