Tašavallan enšimmäistä ruokafestivalie pietäh Petroskoissa
Karjalan enšimmäini ruokafestivali avattih Petroskoissa. Maissella Karjalan ravintolojen šyömisie ta juomisie, ošallistuo muasteri-oppiloih, kuunnella luventoja, tiijuštua mukavie tietoja Karjalan kanšojen ruuvvista šekä käyvä marja- ta mesijarmankalla voipi šuovattana iltah šuaten.
— Kanšojen kanšallisien šyömisien festivalin pitämisen ajatuš šynty, konša myö pitimä pomorien keittijön festivalie ta näkimä, kuin šuurta kiinnoššušta še šynnytti. Šieläki myö ymmärtimä, kuin äijän reseptijä on unohettu, šanottih festivalin järještäjät avajaisissa.
Festivalin keškipaikalla šeiso šiirrettävä venäläini kiukua, šiinä paissettih kalittoja. Kalittoja laitettih karjalaiset naiset ta neiččyöt eri paikoista: vienankarjalaiset, livviläiset, lyydiläiset. Konša hyö valmissettih kalittoja kerrottih perintehistä, kumpaset šäilyttih heijän reseptiloissa.
— Mie käytän miun muamon pualikkua, tyttö Nika käyttäy hänen pravoämmön pualikkua. Ne ollah oikein kallehet meilä, emmä anna niitä nikellä. Myö olemma Kuujärven lyydiläiset ta myö tykkyämmä kalittoja talkkunan kera, šitä maltamma luatie ičen, šano Ol’ga Nikolajevna Kiprušova.
Kalittojen muasteri-opin jälkeh piettih vielä kalakukon muasteri-oppie ta keittäjien kilpailuja.
Festivalin tarkoitukšena on antua enemmän tietoja karjalaisien, vepšäläisie ta pomorilaisien keittijöštä. Järještäjät toivotah, jotta šiitä tulou jokavuotini tapahtuma.
