Täl vodel Totaližen diktantan voib kirjutada vepsän-ki kelel
Vodel 2026 Totaližen diktantan aigan nelländen kerdan mäneb “Tot.Jazik”-akcii, mitte andab erazvuiččiden rahvahiden ezitajile voimusen kirjutada diktantan heiden kodikelil. Täl kerdal Diktantan tekstaks om ottud Aleksei Varlamovan prozad — se oli kätud 26 kel’he, miččiden keskes oma vepsän da ižoran keled. Totaline diktant mäneb 18. sulakud enamba 50 sijas kut Venämal, muga verhiš maiš-ki, miš tedotab Diktantan prezz-zlužb sen oficialižel internet-lehtpolel. Kirjutada Diktantan voib mugažo online.
— “Tot.Jazik”-projekt om oigetud Venäman rahvahiden keliden kaičendaha da kehitoitandaha, mi kožub meiden man südäinpolitikan tegendoihe. 2026. voz’ om Venäman rahvahiden ühtmuden voz’, i nece azjtego putub kaikid tärktembiden azjtegoiden luguhu. Meiden mahtišt ozutab, miše ristituile om melentartušt opeta kodikelid, hö ihastusiš kävutoitaba niid, sanub “Totaline diktant” -fondan pämez’ V’ačeslav Bel’akov.
Venämal “Tot.Jazik”-akcijan offline-sijad voib löuta Ulan-Udes, Irkutskas, Lodeinijas Pöudos, Omskas, Petropavlovsk-Kamčatskijas, Čeboksariš, Čel’abinskas, Čitas, Rostov-na-Donu-lidnas da toižiš lidnoiš, a verhiš maiš — Alma-Atas, Berlinas, Dublinas i Stambulas.
Miše tedištada, tehtas-ik teiden lidnas specialine offline-sija “Tot.Jazik”-akcijan täht, tariž kirjutada projektan tegijoile socialižiš verkoiš (heiden kontaktad oma paindud akcijan lidnoiden internet-lehtpolil).
Totaline diktant om jogavozne tedotelend-kul’turine akcii, miččen pätegend om mel’dütoitta ristituid kodikeliden opendusel, tehta heiden paginad oiktembaks da bohatambaks, a mugažo abutada niile, ken opendab venäkel’t. Ezmäine Diktant mäni vodel 2004, i 22 vodes se tehtihe rahvahidenkeskeižeks: nügüd’ tehta Diktantad abutab volont’oroid erazvuiččiš mirun lidnoišpäi.
Muloi Totaline diktand kirjutadihe 1 329 047 mest 50 maspäi (offline-sijoiš da internetan abul). Edeližil vozil tekstoiden avtoroin oliba mugoižed tetabad kirjutajad, kut Pavel Basinskii, Guzel’ Jahina, Jevgenii Vodolazkin, Dina Rubina, Aleksei Ivanov, Marina Stepnova, Andrei Gelasimov da toižed. “Totaline diktant” -projekt tehtas Prezidentan grantoiden fondan abul da oficiaižiden partn’oroiden ühthižtös.
Uzištoid neciš temas voib lugeda mugažo karjalaks da venäks.
Tarkištele "Oma Median" MAX-kanalad!
