Svetlana Jeršovale Kurbaspäi anttihe ”Arvostadud eläi”-nimi

Svetlana Jeršova tegi suren panendan ičeze kodikülän vepsän kul’turan kaičendaha. Kuva: P’otr Vasiljev

Vidl-külän deputatoiden sovet, Vepsän kul’tursebr, Vidlan openduzkeskuz da ”Vepsän kond”-sebr taričiba Svetlana Ivanovnad ”Podporožjen rajonan arvostadud eläi”-arvnimen kandidataks hänen sures panendas vepsän kul’turan da kelen kaičendaha, oppindaha da kehitoitusehe.

— Svetlana Ivanovna kaiken ičeze elon oppib, kehitoitab da kaičeb vepsläižiden kul’turad da kel’t. Mö lujas pit’kha varastim necen pätusen da lopuks se tuli eloho. Mö tahtoim sanuda sured spasibod kaikile ei üks’kaikuižile ristituile, deputatoile, ked tegiba necen tärktan da tarbhaižen pätusen, sanub P’otr Vasiljev, aktivist, lehtmez’, ”Sverskije berega”- Vkontakte gruppan ohjandai.

Svetlana Jeršova ičeze vägil tegi da kaiči Kurb-küläs Vepsän muzejan, mitte nügüd’ om Podporožjen rajonan kodirandaižen muzejan filial. Hän om üksjäine muzejan radnik, kudamb iče vasttab turistoid da tegeb ekskursijoid.