Suuri etnogruafine sanelu: 1.–8. kylmykuudu pietäh jo kymmenes
1.—8. kylmykuudu 2025 Ven’an kaikis subjektois da rajan tagan pietäh Kogo Ven’an X tiijonandai aktsii ”Suuri etnogruafine sanelu”. Tänä vuon sanelu kuuluu kanzoinvälizeh Ven’an da SNG-mualoin kanzat -festivualin programmah, kuduadu pietäh Ven’an prezidentan kehoitukses.
— Merkittävy kymmenes sanelu on enämbi, migu tiedoloin tarkastus. Sanelu avvuttau ellendiä meijän tavoin syvytty da eriluadužuttu, juohattau perindön säilyttämizen tärgevytty,” sanou Ven’an kanzalližusazieloin federuallizen agenstvan piämies Igor’ Barinov tiedottehes.
Saneluu pietäh vuvves 2016 algajen Udmurtien kanzallizen poliitiekan ministerstvan da alovehen aktiivizen nuorižon kehoitukses. Sanelun tavoittehennu on tuttavuttua meijän muan eläjii Ven’an rahvahien kul’tuuroin moniluaduvuoh da andua heile mahton arvostua omua etnokul’tuuristu opastustu.
Aktsieh voibi yhtyö jogahine ristikanzu igäh, opastundah, kanzalližuoh da eländykohtah huolimata. Sanelun piendymuodo on endine: testas on 30 kyzymysty, sen luadimizeh annetah 45 minuuttua da oigielois vastavuksis voibi suaha 100 ballua. Kyzymyksih voibi vastata internetasgi, testu on sijoitettu saitale.
Aihies voit lugie vepsäkse da suomekse.
