Sulakun “Kodima”: tradicijad da uzištod
Eloho läksi sulakun “Kodima”-lehtesen nomer, miččes starinoitas suriš da peniš azjtegoiš, a mugažo melentartuižiš i lahjakahiš ristituiš.
Sulakun “Kodima” zavodiše praznikoil: “Tähtazvihm”-festivalil da “Kantele”-ansambl’an jubilejal. Täl vodel “Tähtazvihm”-festivalihe ühtni 35 last erazvuiččiš Karjalan külišpäi. Ühtes lapsidenke scenal eziniba heiden kazvatajad, vanhembad, baboid, dedoid, sizared da velled. Nece oli vessel perehiden praznik.
— “Kantele”-ansambl’ale om täudnus 90 vot, i nece om ani tärged aigtego kaikile Karjalan rahvahale. Om hüvä muštta, miše kollektivan sädandelon augotišes kargud “Kantelele” tegi tetab vepsläine horeograf Vasilii Kononov, sanui “Oma Media” -portalale “Kodiman” pätoimitai Irina Sotnikova.
Mugažo sulakus mäniba tarbhaižed da lämäd vastused. Kalages vastsihe vepsän kelen opendajad. Nece vastuz andoi čoman voimusen diskutiruida kodikelen opendusen nügüdläižiš problemoiš da sen tulijas aigas. Petroskoiš “Vepsläine”-studijas mäni vastuz tetaban tedomehenke, kändajanke, kirjutajanke da runoilijanke Nina Zaicevanke. Vastusele kerazihe Vepsän kul’tursebran da “Vepsläižed besedad” -paginkluban aktivižed ühtnikad, Petroskoin universitetan üläopenikad da vepsläižen kul’turan i kelen navedijad.
Kodikeliden specialistad vastsihe lapsidenke Šokšus da Šoutjärves — sigä mäniba Karjalan Rahvahiden sebruden kodin “Sebruden urokad”. Neniden aigan “Kipinä”-kulehtesen radnikad vediba vepsän kelen mastar’-klassad, a kargaidai Irina Kudr’ašova i “Kičči-kočči”-ansambl’an ohjandai Alina Kartinen openziba lapsid kargaidamha da vändmaha kantelel.
Sulakun “Kodimas” om paindud pit’k da čoma material, mitte om omištadud vepsän kelen istorijale. Siš starinoitas ezmäižiš abekirjoiš, rahvahaližen joukvestišton panendas vepsän kelen kehitoitandaha, vepsläižen literaturan sündundas, kodikeliden openduses školiš.
Udes nomeras čomaliteraturan navedijad voib löuta “Kuz’mičan starinad” -ciklan jatktand Irina Sotnikovan kändandas.
Johtutam, miše “Kodima”-lehtesed jagetas maksuta.
Tarkištele "Oma Median" MAX-kanalad!
