Sortavalan ”Vereja”-ansambl’ pästi uden klipan
Rahvahan ”Vereja”-ansambl’ pästi Änižröunan ”Sobatan” -pajon klipan, mitte oli tehtud ”Rosmolodež” -projektan aigan.
— Projekt zavodihe vodel 2024 elokus i tuli lophu vodel 2025 semendkus. Sen satuseks tuli ”Sobatan”-pajon klip da muzikal’bom, mitte nügüd’ om distribjucujas. Pigai meiden pajoid voib kulištada Internetas, sanui Oma Media -portalale ”Verejan” ohjandai Margarita Berežnaja.
Rahvahan ”Vereja”-ansambl’ popul’arizoitab Karjalan muzikkul’turad nügüdläižes stil’as, mitte om sel’ged norištole. Jouk ezitab Karjalan rahvahiden etništ muzikad, kävutab rahvahan äniden tembroid, rahvahaližid vändimid da erazvuiččid nügüd’aigaližid taidehen formid.
Udes al’bomas ezitadas Änižröunan, Pudožan da Inkerin pajoid, mugažo pajoid karjalan kelen livvin paginal.
— Klipas kaik om norišton armastuses, ezmäižiš tundmusiš da heledoiš palahtelusiš. Koume päiväd radod — homendesespäi ehthasai — i sid’-žo tö kulet nenid rahvahan melodijoid nügüdläižes kulundas!, starinoičeb ”Vereja” ičeze VKontakte-lehtpolel.
Mugažo, ”Vereja”-ansambl’an ”Soitua Maa”-al’bom mülüškanzi Venäman fol’klorižen da etnižen muzikan topha-10 ”Russian World Music Chart 2024”.
Uzištoid neciš temas voib lugeda mugažo karjalaks, da venäks.
