Sananluojat palkittih Petroskois
Karjalas on loppevunnuh alguajien karjalakse, vepsäkse da suomekse kirjuttajien kilbu. Arvostusjoukko valličči parahii runoloi, prouzu- da lapsile tarkoitettuloi kirjutuksii. Kilbah oli työtty 21 tevostu 13 kilbuniekas.
Omaluaduine prouzu- da runohustevos kanzallizil kielil -nominatsies enzimäzele sijale on piässyh Oma Mua -lehten toimittai L’ubov’ Baltazar. Häi on suannuh voiton livvinkielizien runoloin kogomukses.
— Täh kilvah annoin erilazii runoloi Karjalan rahvahah da luondoh näh. "Algajien" kilbah päin sentäh, ku minul ei ole painettuu kirjua, hos runuo on jo vägi tukku, enimät jälgimäzien viijen vuvven aigua, konzu rubein uvvessah ruadamah Oman Muan toimitukses. Buite en ni olis ihan "algai", sanoi Oma Mediale L’ubov’ Baltazar.
Runoloin kiändämine kiinnittäy inehmizen mieldy ylen ammui da äijäl, häi ainos lugou kiännösteoriedu.
Toizele sijale on piässyh tuaste Oma Mua -lehten toimittai Uljana Maksimova. Häi on työndänyh kilbah oman kerdomuksen ”Pohjazen mečän emändy”.
Kolmanden sijan on suannuh vepsäläine Nadežda Agapitova, kudai opastuu vepsiä kielikursiloil. Häi on työndänyh kilbah lapsienkirjutuksen.
Nominatsies ”Prouzu- da runohustevoksien kiännökset ven’an kielele” voittajakse on sanottu Ol’ga Hramtsova, Karjalan opastuskeskuksen kehityksen instituutan vahnin metodistu. Ol’ga Anatoljevna on kiändänyh kilbah Miikul Pahomovan lyydinkielizen Andeli-runon.
Toizele sijale on piässyh lapsien Kipinä-lehten toimittai Ol’ga Dubitskaja. Kilbah häi on kiändänyh katkelman P’otr Sem’onovan kirjas ”Puhtasjärven Maša”.
Kilvan täs nominatsies kolmandele sijäle on pandu lyydinkarjalaine Ol’ga Pozdn’akova. Kilbah häi on kiändänyh lyydikse vienankarjalazen Ildupagin-runon.
Kilvan voittajat suadih diplomat da palkindot Kanzallizen da alovehellizen poliitiekan ministran Sergei Kisel’ovan käzis.
Aihies voit lugie ven'aksegi.
Yhty Oman Median kanualah MAX:as!
