Sampo-leipätehaš tarviččou uuvvissušta
Nyt leipätehaš on yksi šuurimmista Karjalan ruokatevollisuon laitokšista. Joka kuukauši še tuottau noin 150 tonnie leipätuottehie, 32 tonnie maikeita paissokšie, kolme tonnie maijonesie ta 50 tonnie vettä.
– On tärkie, jotta laitoš šäilyttäy vielä neuvoštoliiton ajoista tunnettuja tuottehie, kumpasie oššetah Karjalašša šekä šen ulkopuolellaki. Laitokšella laitetah luonnolista ruokua ta še on šäilytettävä nykyaikasilla markkinoilla, šano piämieš Artur Parfenčikov.
Sampo-tehtahan šuunnitelmissa on šuurentua tuotantuo, luatie uušie tuottehie, niijen joukošša tervehellistä ruokua. Jotta ruato olis šujuvana iellähki tehaš tarviččou uuvvissušta. Karjalan piämieš ta tehtahan johtaja Denis Negrijenko keškuššeltih mitein rutompah kehittyä laitošta ta noštua šen šähkötehokkušta. Tänä vuotena “Sampo” voit šuaha rahotušta, esimerkiksi, pakkaukšien oštamiseh ta leivän kuletukšeh myöntipaikoilla.
Tapuamisen tulokšena oli piätöš šiitä, jotta laitokšen johtaja tašavallan viranomasien avulla rupeiu valmistamah uuvvissušprojektie, jotta tehaš voitais ottua valtijollisen kannatukšen ohjelmih.
