Samaras korktas arvostadihe fil’mad Karjalaspäi
Koume päiväd Samara-lidnas mäni sociališt temad koskijoiden fil’moiden da teleozutesiden festival’. Sil ”Jätan ičein jäl’gen” («Последний из Чайгино»)- fil’m vepsän kelel toi ičeze tegijoile jo videnden vägestusen.
Kaiked ”Герой нашего времени” festivalile oli oigetud 118 teleozutest da fil’mad erazvuiččiš Venäman lidnoišpäi. Konkursan ühtnikoiden täht pidetihe tetabiden teleohjandajiden da prod’useriden mastar’-klassoid, ištundpaginoid, fil’moiden avaitud kacundoid da diskussijad.
— Lujas holduin oiktan efiran aigan, konz žurijouk kacundan jäl’ghe diskutirui kaikuttušt fil’mad, no sen-žo aigan oli mel’he kulištada mugoižen korktan arvostelusen meiden fil’male ningoižil professionaližil mehilpäi. Žal’, miše en voind jagata ilod vägestusespäi ühtes kollegoidenke pauklahjoičendan aigan, sanui ”Jätan ičein jäl’gen”-fil’man kuvadai Igor’ Arehovskii.
”Jätan ičein jäl’gen” (16+) vägesti festivalil Samaras ”Профессия и призвание”-nominacijas da mugažo sai Televidenijan da radion rahvahankeskeižen akademijan kuldaižen medalin.
Johtutam, miše”Jätan ičein jäl’gen”-fil’m jo vägesti ”СеЗаМ”- öbokan lehtez-, TV- da radioradnikoiden konkursal Piteriš ” Впечатляющий сюжет”-nominacijas, sai specialižed lahjad Karjalan žurnalistoiden sebraspäi da parahimas kuvadajan rados ”Голос Евразии”-konkursal Mahačkala-lidnas.
Mugažo ”Jätan ičein jäl’gen”-fil’m om finalistoiden lugetišes ”ТЭФИ-Регион-2022”. Sen ühthevedod tehtas kül’mkun lopus.
Mugažo ”Герой нашего времени”-festivalil ”Открытие”-nominacijas kacujiden mel’düdiden lahjan sai toine fil’m Karjalaspäi ”Достояние Республики Карелия. Владислав Ларин”.
