Sohjanankošen kyläššä piettih kalaštajan pruasniekka, šamoin še on pos’olkan päivä. Toimenpivošša avattih Louhen piirin runonlaulajilla omissettu muistomerkki.
Tänä vuotena pruasniekan ohjelma oli erikoini. Karjalaisien runojen vuuvven rajoissa kylän kulttuuritalon lähellä avattih Runonlaulajien ta starinankertojien muistomerkki – veneheššä istuja Väinämöini.
– Enšin oli ajatuš luatie muistomerkki vanhašta laivašta. Sohjanankošešša ennein oli kalatehaš ta šiitä jäi äijän vanhua laivua, yksi niistä vois šeisuo kyläššä ta muissuttua tehtahan entiseštä šuurešta ruavošta. Täštä ajatukšešta paikallini eläjä Aleksandr Zaikov kerto Piäjärveštä kotosin olijalla tietomiehellä Marija Kundozerovalla, hiän kehitti tätä idejua ta ehotti luatie muistomerkki veneheštä. Još on veneh, ni šiinä pitäis olla šoutajaki. Raisa Kundozerova luati olkiloista ta vanhoista vuatteista Väinämöisen ta issutti šen veneheh. Näin šynty tämä muistomerkki, kerto Sohjanankošen kulttuuritalon ruataja Jelena Ligotskaja.
Muistomerkin lähellä on tiijotuštaulu. Šiitä šuau lukie Nisan, Tunkujärven, Sohjanankošen ta lähikylien starinankertojista, runonlaulajista.
Muistomerkki valmissettih Karjalan Šivissyššeuran kannatukšella yhteisruavošša Vienan virta -kanšalaisjärještön kera. Projektin valmistajana on Karjalan tietokeškukšen ruataja Marija Kundozerova.