Resurssikeškukšen kurššien kuuvveš opaššušvuosi jatkuu
Kieliresurssikeškuš toimiu jo šeččemettä vuotta. Kuuvven vuuvven aikana keškukšešša pietäh kielikurššija aikuhisilla, nelläš opaššušvuosi alko tänä šykyšynä Kičči-Kočči -lapšien kieliryhmäššä.
Petroskoilaiset voijah opaštuo karjalan kielen livvin, lyydin ta vienan murrehta šekä vepšän kieltä alku- ta jatkoryhmissä Petroskoissa. Opaštajina ollah Tatjana Baranova, Galina Paršukova, Uljana Tikkanen ta Marija Šašina. Keškukšen toiminnan rajoissa on järješšetty vielä livvin šekä vienan online-kurššit, niijen opaštajina ollah Valerija Grafova ta Marija Mitina. Parentua šuomen kielen taituo voipi pakinakerhošša, šitä pitäy Tatjana Islamajeva Petroskoissa.
— Joka ryhmäššä on yli kymmenen henkie, eryähissä ni yli 20. Alkukurššiloih tuli äijän nuorie, monet niistä tiijuššetah kurššiloista kielikeškukšen šekä Karjalan kanšojen yštävyštalon tilaisukšissa, esimerkiksi, nuorisoforumissa, missä myö joka kerta šanomma Periodika-kuštantamon toiminnašta, šano kieliresurssikeškukšen spesialisti Alina Kartinen.
On tärkie vielä lisitä, jotta opaššuškurššija varoin ei ole valmista opaššušmetodikkua. Joka opaštaja iče valmistau ta vuosi vuuvvelta parentau šitä.
Nelläš opaššušvuosi alko Kičči-Kočči-lapšienryhmäššä ta heti oli jo pietty uuvven opaššuškauven enšimmäini esityš. Oppituntija pietäh Marina Tukkija ta Alina Kartinen. Tänä vuotena šuunnitelmissa on tuttavuštua lapšie uuših teemoih ta ošallistuo konserttiloih ta lapšien festivaliloih, kuin esimerkiksi “Vepšäläini šuarna”.
Opaššušvuuvvekši on äijä šuunnitelmie, ka kaikki opaštujat ollah valmehet ruatamah ta šuamah uušie tietoja.
