Läksi eloho uz’ “Kodiman” nomer, mitte starinoičeb ičeze lugijoile äjiš azjtegoiš — suriš da peniš. Ozutesikš, redukun lehteses voib tedištada siš, miše Kalages avaitihe muštpacaz min’oroiden muštoks, — aigtegos, mittušt silajižed eläjad varastiba lujas pit’kha.
Mugažo uz’ nomer ihastoitab kaikid starinal Gleb Fominas — Šokšun školan vepsän kelen opendajas, kudamb tegihe vägestajaks ühthižvenälaižes pedagogižes konkursas. Vepsläižed ülendasoiš Gleban vägestusel, i “Kodima”-lehtesen toimišt mugažo ozateleb lahjakast opendajad!
Sügüz’kun lopus Petroskoiš mäni kaks’ melentartušt konferencijad: “Vepsläižed starinad” da “Bubrihan lugendad”. Ezmäine tundištoiti norid mehid vepsläižiden mirunke, starinoiči heile kaikid tärktembid faktoid neciš Karjalan rahvahas; toine oli oigetud tedomehiže da andoi kundlijoile voimusen tedištada uziš tedo-oppindoiš da -avaidusiš.
— Neciš nomeras kirjutim mugažo kahtes čomas praznikas. Šoutjärven vepsläižes etnografižes muzejas mäni azjtego, mitte oli omištadud vepsläižele pajole, a “Periodika”-painištos praznuitihe “Kipinä”-kulehtesen 40-vottušt jubilejad — sen täht vaumištadihe melentartuine kviz Karjalan rahvahiden polhe, starinoiči “Oma Media” -portalale “Kodiman” pätoimitai Irina Sotnikova.
Kaiken ližaks redukun “Kodimas” voib tedištada Šoutjärven lapsiden päivkodin uziš satusiš, Anastasia Jevtušenkon ühtnendas “Kundaližen diplomatijan školha”, mitte mäni Narjan-Maras, da Oleg Mošnikovan matkas Hanti-Mansijsk-lidnaha.
Udes nomeras čomaliteraturan navedijad löudaba Ivan Gul’ajevan prozad da Oleg Mošnikovan runotust.
Johtutam, miše “Kodima”-lehtesed jagetas maksuta.
Tarkištele "Oma Median" MAX-kanalad!