Rad vepsänkeližiden kirjoiden anetamižen mödhe jatktase
Petroskoin professionaližes änenstudjas Vepsän kul’tursebran ”Kel’ — minun Kodima”-projektan abul zavottihe änestada kirjoid vepsän kelel. Ühtnikoiden keskes oma openikad da üläopenikad, kudambad opendaba vepsän kel’t.
Vepsän kul’tursebran ”Kel’ — minun Kodima”-projektan aigan zavottihe änetada kirjoid vepsän kelel. Kirjoiden änetamižehe ühtneba openikad Änižröunan koumes küläspäi: Kalagen, Šoutjärven da Šokšun školišpäi, mugažo lapsed Petroskoin Suomalaiž-ugrilaižes školaspäi da üläopenikad, kudambad opendaba vepsän kel’t. Täl kerdal änetadas vepsläižiden runoilijoiden koume kirajd lapsiden täht: Nina Zaicevan ”Izo Lizoi”-kirj da Ol’ga Žukovan ”Mäthudel”- da ”Ezmäine änik”- kirjoid, jäl’gmäne teravas lähteb eloho.
— Lapsidenke radab professionaline änenohjandai, kudamb opendab heid oikti lugemaha runoid. Lapsed surel tahtol ühtneba kirjoiden änetamižehe, nece azj om heile mel’he. Muga, taidehsanan kal’t kodikelel mö tahtoim opeta lapsid navedimha vepsän rahvahan kel’t, tradicijoid, kul’turad, sanub Vepsän kul’tursebran pämez’ Larisa Čirkova.
Audiokirjoid kodikelel kävutaba opendajad vepsän kelen urokoil, mugažo ned oma popul’arižed neniden ristituiden keskes, kelle om melentartušt vepsän kel’, ken opendab sidä.
— Ezmäižen kerdan änetin runoid professionaližes studijas. Nece om lujas jüged azj, pidab otta homaičusehe kaik: keskznamoid, oiktad änetust, miše kaik sanad oližiba selktad vepsläižile. Meil oma lujas hüväd abunikad. Ken-se lapsišpäi mugažo tuli ezmäižen kerdan, heiden täht nece om hüvä mahtišt, jagoihe mel’pidol Suomalaiž-ugrilaižen školan vepsän kelen opendai Nadežda Petrova.
Konz audiokirjad lähteba eloho, niid pandas Internetaha, Vkontakte-socialižehe verkoho, sen ližaks ”Arktikan lapsed”-portalale, kus om jo nel’l’ audiokirjad vepsän kelel, a mugažo ”Oma media”-portalale.
Johtutam, ”Kel’ — minun Kodima”-projekt todenzoittas vodel 2023 Karjalan pämehen grantoiden fondan rahatugele.
