”Elonpu”-praznikale Vidl-küläs kerazihe äi rahvast, tuli äi adivoid suriš lidnoišpäi i toižiš agjoišpäi. Möst Ojat’-jogen päl kului čoma vepsän pagin, Vidlan päavoirdal fol’klorkollektivad erazvuiččiš agjoišpäi ozutiba ičeze parahimid programmoid, a mastarid ezitiba ičeze käziradoid ozuteluzriviš.
— Ihastoitab se, miše ristituile, kudambad oma sündnuded vepsläižiš küliš, om melentartušt ičeze ezitatoiden kul’turan jäl’genduz, hö ülevas starinoičeba ičeze läheližile i tutabile ristituile, lapsile i vunukoile ičeze penes kodimas i veba heid tänna, ühtneba vepsläižihe praznikoihe. Nece znamoičeb, miše vepsän kel’ kuluškandeb Ojatin randoil, sanub praznikan adiv P’otr Vasiljev.
Praznikan adivod hüviš meliš ühtniba erazvuiččihe mastar’-klassoihe, konkursoihe, ostliba muštlahjoid ičhižile. Mugažo heil oli hüvä voimuz tundištadas vepsän ranvahan kul’turanke da tradicijoidenke, nägištada tradicionaližid vepsläižid sädoid i kulištada čomad vepsän paginad.