“Pomorien kultalanka” esitteli omie vuatteita Moskovan Kremlissä ta Pekinissä
Talvikuušša Pomorien kultalanka -yhtijö vieraili Moskovašša ta Pekinissä, missä esitteli Venäjän Pohjosen kultalankamerkkaušta. Asiešta tiijottau Karjalan tašavallan tevollisuš- ta kauppaminitserijö poštaukšessah Vkontaktešša.
Talvikuun alušša valtijollisen Kremlin palatissa vietettih ainutluatuni Venäjän muotialan johtajat -näyttely. Näyttötilašša esiteltih Venäjän tunnetuimpie merkkijä, muun muašša Karjalan kultalankamerkkaušta.
— “Pomorien kultalankan” šuavutukšet tovissetah, jotta perintehet ta nykyaika voijah šopie ta luatie oikeita meštaritevokšie. Meijän muasterit luajitah oikeita Karjalan simvolija, kumpaset ylpiešti etuššetah tašavaltua muan ta muailman tärkeimmissä tilaisukšissa, šano Karjalan tevollisuš- ta kauppaministeri Svetlana Astahova omalla lehistöpalvelulla.
Talvikuun 12. päivänä Pekinissä piettih enšimmäini Discover Russia -tilaisuš. Venäjän šuurlähetykšen tiloissa “Pomorien kultalanka” esitteli kultalankalla merkattuja kiiltäjie iltavuatteita.
Šamoin ošallistujien luvušša oltih Ololol, Polina Repik, Viva Vox, Jeletskije kruževa, Toržokskije zolotošveji ta toiset merkit.
— Meilä še on tärkie tilaisuš — meijän alovehellini merkki ei ainuoštah šäilytä ta elvytä vanhua kultalankamerkkaušta, vain eistyy kanšainvälisellä tašolla esitellen ainutluatuisie vuatteita. A meijän kiinalaisilla toveriloilla še on mainijo mahollisuš šuaha tietyä enemmän venäläiseštä kullttuurista ta avata šen rikkahan ta monipuolisen perinnön uušie aspektija muotitaijon ta kanšanelinkeinojen kautti, lainatah “Pomorien kultalankan” Vkontakte-šivulla yhtijön johtajan Natalja Lisenkovskajan šanoja.
Aihiešta voit lukie niise šuomekši.
Yhty Oman Median Telegram-kanalah!
