Muatalovus: Petroskois avavuu jarmanku
Jarmankas suau ostua Karjalan da Ven’an laitoksien tuottehii: lihahistu, maidohistu, metty, n’amuu, käziluajilmuksii, sobii, eri kazvoksien taimenii, da, tiettäväine, ouveššiloi. Äijät petroskoilazet ostetah sit jarmankas ouveššiloi kogo vuvvekse, enimite kartohkua, muga on huogehembi, da se on oma, Karjalas kazvatettu. Ga tänävuon ei pie vuottua huovistu kartohkua, sen hindu on äijän kazvanuh räkkikezän periä.
– Kartohkan hindu on kazvanuh 30 prosental kogo Ven’al räkkikezän periä. Tobjua kartohkua sežo vuottua ei pie. Kilo kartohkua maksau 25-30 rubl’ua. Myö tänävuon jarmankale emmo lähte, ei ole sen verdua kartohkua, sanou Fermer Karelii -laitoksen omistajii Ksenija Sosunkevič.
Roinnougo jarmankas Karjalas kazvatettuu kartohkua, Karjalan tazavallan kehityksen korporatsies vie ei voija sanuo. Myöjien luvettelo roih valmis vaiku tuliel nedälil.
