Petroskoil juohateltih Suomes piettäviä Karjalan kielen päiviä
Suomes piettih Karjalan kielen päivy 27. kylmykuudu. Karjalan kielele – virralline stuatussu -VK-sivun aktivistat jo kolmattu vuottu potakoijah meijän puolen karjalazii yhtevyksii juomah sinä piän bes’odučuajun yhtes pruazniekan kunnivokse.
Pienehkö karjalaizien aktivistoin joukko ruohti “koronan” aijal kerävyö mennyt piätenčän Petroskoin Ilma-kafeeh šipainiekku-stolah pagizemah vereksembii uudizii. Karjalazien IX kerähmön vallittuloin nevvoston paginanvedäi Raisa Samodajeva viestitti:
– Kielistuatusan kyzymys tuaste, jo kudamuagi kerdua, on lähtemäs Karjalan parluamentah da Karjalan Konstituustien toizien muutoksienke ruvetah šeikuiččemah sidägi.
Kieliaktivistu Natalja Antonova ezitti oman kniigan “ABČ. Askel kohti karjalan kieldy”, kudamas suau tiijustua, kui vois opastua lapsii karjalan kieleh nygyelaijas. Ližäkse kerdoi, kui piettih Karjalan kieli eläy -nedälii Suomes, Karjalan Sivistysseuran da Päivännouzu-Suomen yliopiston väil. Piälimäizii täs on olluh karjalakse kirjuttamine soomeh (sotsiuallizeh mediah) da KSS:n internetsivun Uudisčuppuzeh, myös karjalažuon kyzymyksien nostandu Suomen mediah. Suomes Karjalan kielen päiviä pietäh vuvves 2016 algajen.
