Petroskoiš azotadihe muštpacaz kuldsepäle Jalgubaspäi
Mihail Perhinan muštpachan azotamine sütuti äi ridoid ühthižkundas. Ridlihe sen azotandsijas da surudes. Kaik-se tämbei mäni muštmachan avaidusen ceremonii, nügüd’ se seižub Petroskoin randirdal.
Mihail Perhin sündui Änižjärven rajonas, Jalguba-küläs. Norudes hän ajoi Piterihe. Perhin openzihe kuldsepän radho, oli Karl Faberžen päabunikan, a sid’ avaiži ičeze töpajan. Mihail Perhin sädi 28 tetabad ”Faberže”-munad.
— Läz kaikuččele ristitule om tetab Faberže-nimi, no vähä, ken tedab eskai Karjalas Mihail Perhinad. Tämbei kaik om tehtud oiktusen mödhe. Nügüd’ mö voim ülenzoitta necidä tetabad lahjakast kuldsepäd, sanui Karjalan Valdmehišton socialižiden azjoiden premjer-ministran varapämez’ Larisa Podsadnik.
Muštpachan vestai om Pavel Kaltigin. Pavel om petroskoilaine, nügüd’ eläb Piteriš. Hän om mugošt mel’t, miše muštpachan sija om valitud oikti. Uz’ muštpacaz ližazi da lopi ei amu kohetud tahon kompozicijan randirdal. Pavel Kaltiginanke ühtes muštpachan sädamižes radoiba arhitektor Anton Korol’ov da vestai Jurii Gorbunov.
— Sur’ arvostuz meiden täht oli tehta mugošt radod. Mihail Perhin om homaičusen arvoine mez’, sanui Jurii Gorbunov.
Paiči Petroskoid muštpacaz Mihail Perhinale om mugažo Piteriš, Estinmal da Italias.
