“Periodikas” mäneb vepsläižiden runoilijoiden mušteht

Mušteht om omištadud koumele vepsläižele runoilijale – Nikolai Abramovale, Alevtina Andrejevale da Ol’ga Žukovale. 6+ Kuva: “Vepsän kul’tursebran” oficialine VKontakte-lehtpol’

Pätničan, 6. uhokud, 17:00 časud Karjalan Valdkundan Rahvahiden sebruden kodiš mäneb mušteht, mitte om omištadud koumele vepsläižele runoilijale — Nikolai Abramovale, Alevtina Andrejevale da Ol’ga Žukovale. Siš tedotadas “Vepsän kul’tursebran” oficialižel VKontakte-lehtpolel. Nene runoilijad oliba vepsän rahvahan literaturan augonpanijad i tegiba suren panendan vepsläižehe kul’turaha, vepsän kelen opendusehe, a mugažo rahvahaližehe joukvestištoho.

Muštehtal planuitas lugeda än’heze runoid, starinoita Nikolai Abramovan, Alevtina Andrejevan da Ol’ga Žukovan elon polhe, johtutada heiden znamasižiš päiviš da diskutiruida vepsläižiš.

— Muštehtale kucuim “Randaine”-kollektivad, se čomitab meiden azjtegon. Planuičem pajatada pajoid, miččed oli kirjutadud Nikolai Abramovan da Alevtina Andrejevan runoile, sanui “Oma Media” -portalale üks’ ehtan tegijoišpäi Irina Popova.

Azjtegole voib päzuda ilma maksuta. Rahvahiden sebruden kodi kucub kaikid vepsän rahvahan kul’turan navedijoid, runoilijoiden sebranikoid i läheližid ühtnemaha sihe.

Muštehtan tegijad oma “Vepsän kul’tursebr” da “Vepsläižed besedad” -paginklub.

Uzišt neciš temas voib lugeda mugažo venäks.

Tarkištele "Oma Median" Telegram-kanalad!