Periodika-julguamo sanelou omassah ruavos Moskovas
Moskovas Ven’an valdivollizes lapsien kirjastos 3.—5. talvikuudu pietäh III Kanzoinväline lapsien da nuorižon kirjoin fourumu ”Lapsien literatuuran kielel: yhtehine ruado lapsien literatuuran da lugemizen alal”. Pidoh yhtyy kaheksa valdivuo — Ven’a, Valgoven’a, Gruzija, Kazahstan, Kirgizstan, Tadžikistan da Uzbekistan.
Tämän vuvven fouruman aihiekse on otettu ”Folklouru uvven lugijan kazvattamizen perustannu: projektat, yhteisruavon perspektiivat Rippumattomien valdivoloin nevvostoh kuulujis mualois”.
Fourumah yhtynyöt — kirjastoloin, julguamoloin, žurnualoin, muzeiloin ruadajat, lapsien kirjuttajat, IBBY—Kanzoinvälizen lapsien kirjan nevvostoh kuulujat — kerrotah tulokkahis projektois, nygyaigazis kogemuksis, metoudiekois, pietäh paginua lapsien literatuuran da čomazien kehittämizes, ozutetah parahat julgavot da sanellah niilöin eistämizes lugijoile kädeh.
—Ylen äijäl minuu miellytettih Ven’an valdivollizen lapsien kirjastot projektat ”Pis’mennost’” da ”Suarnu”. Meijän julguamo kerdou omassah Kipinä-žurnualas, lapsien kirjois. Sežo sanelemmo lapsile tarkoitettuloi pidolois, kudamii pietäh julguamon joukkoviestimien toimittajat da Ystävyskoin ruadajat da kudamien vuoh myö kiinitämmö lapsien mieldy meijän rahvahien kul’tuuruperindöh da kanzallizih kielih, sanoi Oma Mediale Jevgenija Šustova, Periodika-julguamon piälikkö.
Pivos sanellah kanzoinvälizis kirjukollektsieloi, mennyön vuvven kirjupalkindoloin nominantois da laureatois.
Mustoitammo, ku Periodika-julguamongi In’aine-kirju oli sanottu IBBY:n muailman 100 parahan lapsien kirjan luvettelus vuvvennu 2010.
Yhty Oman Median kanualah Telegramas!
