Perindön mugah Petroskois pietäh ”Kniigumelliččy”
Periodika-julguamon seinis Ystävyskoin seinis 19. kevätkuudu pietäh perindölline ”Kniigumelliččy”. Pivos julguamo ezittäy omat uvvet kirjat da luadiu mennyön vuvven yhtehvevot.
— Pivos sanelemmo kirjois, kuduat julguamo piästi ilmoih vuvvennu 2024. Net ollah ven’ankieline tiedokirju, opastuskniigu vepsän kielel, nouttukogomus da suarnat — rahvahallizet da kirjuttajien kirjutetut. Äijii meijän kirjoi suvaijah da kyzytäh sen verran, ku myö painatutammo niidy äijäh kerdah, sanoi Oma Mediale Jelena Ravitskaja,Periodika-julguamon paino-ozaston piälikkö.
Sanommo, Dmitrii Dmitrijevan ”Runosuarnoi” (0+) mennyt vuon painettih jo viijendeh kerdah. Sežo piäzi ilmoih ”Runosuarnoin” uuzi kirju.
— ”Runosuarnat” piästih ilmoih vuvvennu 2020 da muga miellytettih lugijoi, ga roittihes Periodikan kaikis puaksuvimah painettavikse. Mennyön vuvven ihan lopus nähtih ilman ”Runosuarnat 3”, pani merkile Jelena Ravitskaja.
Pivos kirjoin kirjuttajat da luadijat sanellah omis tevoksis.
Aihies voit lugie vepsäkse, suomekse da ven'akse.
