Vepsän kul’tursebran ištundan aigan Karjalan Rahvahaližen da regionaližen politikan ministerstvan varapämez’ Aleksandra Jeršova andoi tetabale vepsän kelen tedomehele, filologijan tedodoktorale, vepsänkeližiden openduzkirjoiden da vajehnikoiden tegijale Nina Zaicevale ”Za vernost’ Severu”-medalin i Rahvahiden azjoiden federaližen agenstvan kitändkirjeižen sures panendas Venäman rahvahaližen politikan, vepsän kelen da kul’turan kehitoitandaha.
— Nece oli varastamatoi azj minun täht. Spasib, miše arvostadas minun radod, linnen mugoižen-žo aktivižen edemba-ki, sanub Nina Grogorjevna.
”Za vernost’ Severu”-medalin sädi Pohjoižen, Sibirin da Edahaižen Pävnouzman igähižiden vähäluguižiden rahvahiden associacii vodel 2009. Se anttas igähižiden rahvahiden aktivistoile, kudambad kaičeba rahvahiden oiktuzid, tegeba Pohjoižen rahvahiden elod paremba.