Azjtegol oli ezitadud äi literaturad, kirjoiden temad oliba erazvuiččed. Pagištihe venäläižes kul’turas, Venäman istorijas. Mugažo pagin oli toižiš-ki rahvahiš, kudambad eläba Venämal. Gijöm Žiber eziti ičeze ”Virantanaz”-vepsläižen eposan kändmišt.
— Prezentacijal minä lugin ”Virantanaz”-eposan paloid vepsän kelel. Oli äi melentartuižid küzundoid. Ozutesikš, mindai küzutihe ”Oma-ik vepsän kelen urokad universitetas Francijas?”, ”Kut tö openzit vepsän kel’t?”. Oliba mugažo küzundad eposan polhe: ”Mil om bohat vepsän kel’?”, ”Mikš eposan nimes francian kelel om kondi? Mitte znamoičend om sil eposas?!”, sanub Gijöm Žiber.
Kändajan sanoiden mödhe, kirj kingiti ristituiden homaičust, sünduti melentartušt, sidä osttihe tahtol. Paiči literaturad nenil päivil Venäman hengeliž-kul’turižes keskuses mäniba fil’moiden prezentacijad, kudambiš mugažo pagištihe venäläižes literaturas da istorijas.