Mennyt vuon Karjalas piettih Karjalazien runoloin vuottu, kuduan aigua oli luajittu äijy midä hyviä. Rahvas suadih uuttu eriluadustu kniigua kui ven’an mugagi karjalan kielel, tiedomiehien avul tv- da ruadivoprogrammoin kauti levitettih kaikile ellendettäviä tieduo. On kerättygi uuttu ainehistuo tundiettulois runonpajattajis. Petroskoin keskuččah oli avattu Karjalazien runoloin puistikko. Nygöi joga vuottu 10. kezäkuudu ruvetah pidämän Karjalazien runoloin päiviä.
– Keviäl kogo linnan rahvas kabrastetah talven jälles omii pihoi. Karjalan Rahvahan Liitto kuččuu kaikkii yhtymäh täh aktsieh da kuhkuttau tulemah talgohruadoh. Yhtes myö luajimmo Karjalazien runoloin puistikon čomembakse, sanou Liiton johtokunnan piälikkö Anna Jakovleva.
Subotniekku pietäh 6. oraskuudu 15.00 čuasun aigah. Puistikko on Anohinan uuličan18А, 18Б и 18В taloloin välil.
– Toine tärgei aktsii, kudai voi čomendau Karjalazien runoloin puistikon, on sen kunnostus Komfortnaja gorodskaja sreda -programman hantuzis. Pluanois on istuttua puuloi, luadie uuzii kävelytroppazii, azettua pihafonarit da mitahto merki, gu rahvas tiettäs, mikse täl kohtal on annettu moine nimi. Iänestiä voibi gorodsreda.ru -saital 30. päivässäh oraskuudu, sanou KRL:n johtokundah kuului Valentina Mironova.
Kuhkutammo karjalazii yhtymäh talgohruadoh 6. oraskuudu da iänestämäh Karjalazien runoloin puistikon kunnastamizes.