Päivän küzund: Kalagehe ectas feldšarad
Rauhan ristitun päiväks Kalagehe Petroskoišpäi vastusele külän eläjidenke tuli Valdkundan läžundkodin varapämez’ Svetlana Tumanova. Päküzund, mitte letihe, koski tervhuz’tedod - jo enamba vot küläs ei ole kaikenaigališt feldšarad.
— Jo voden mö ecim feldšarad Kalagehe. Tämbei kogonaz Änižröunas om jügedusid radnikkundanke. Äjad lekarid, kudambad tahtoiba tulda radole külähä “Külädoktor”-programman abul, ei kožugoi äjiden kriterijoiden taguiči, sanub Svetlana Tumanova.
Tämbei Kalagehe kaks’ kerdad nedališ (komanz’päivän -lapsidennoks, pätničan -aigvoččidennoks) tuleba feldšarad toižiš külišpäi. Kerdan vodes Petroskoišpäi školha tuleba erazvuiččed lekarid kacmaha openikoid da päivkodin lapsid.
Mugažo vastusel pagištihe rahvahan čapatamižes. Svetlana Tumanovan sanoiden mödhe, äjad külänikad ei tahtoigoi tehta čapatest hädaspäi. Hän starinoiči mugoižes varukahas tartläžundas kut tul’aremija, miččespäi ezmäi kaiked pidab kaitas man elomišton radnikoile.
— Pidab uskotoitta aigvoččid da lapsid tehta čapatez, ližazi Svetlana Tumanova.
