Päiväižen praznik ühtenzoiti vepsän man eläjid i adivoid sur’he kanzaha
Tradicionaline vepsläine praznik ”Pühä päiväine” tegihe jo Šokš-küläs čomaks tradicijaks, joga voden se keradab äi rahvast, adivoid, erazvuiččid kollektivoid. Necil-ki kerdal se oli lujas läm’ i kodikaz. Praznikan avaiži külän pämez’ Viktoria Butorina, hän tervehtoiti i ozateli külän eläjid, adivoid čoman praznikanke. Jäl’ges prazniklaval eziniba erazvuiččed fol’klorkollektivad, hö pajatiba pajoid, kargaižiba i vediba horovodoid. Ihastoitiba ičeze pajoil kodikelel sijaližed-ki eläjad Jurii Mugačev i Mihail Pidžakov.
— Vepsän kul’turan ” Pühä päiväine”-praznik om čoma kezan praznik. Tägä voib vastata sebranikoid i läheližid hengel ristituid. Praznik ühtenzoitab vepsän man eläjid i adivoid sur’he kanzaha. Nece om praznik, mittušt kaik šokšulaižed arvostaba kaites ezitatoiden tradicijoid, sanub Viktoria Butorina.
Praznikan aigan adivod voiba ühtneda erazvuiččihe mastar’-klassoihe, konkursoihe, ostta vepsläšt emägust vai lahjoid muštoks neciš praznikas.
”Pühä päiväine” – nece ei ole vaiše sü veslas mänetada aigad i iloiteldas, se abutab kaita vepsän rahvahan kul’turad i kel’t, tundištoitab eläjid da adivoid vanhoidenke tradicijoidenke da veroidenke.
