Ezmäižel keväden päiväl aktivižele vepsläižele naižele, kodiröunan istorijan tundijale, kirjutajale Valentina Lebedevale täudui 70 vot. Hänen jubilejaks Podporožjen kirjištos avaitihe ozuteluz, mitte om omištadud hänen sädandradole. Sen nimi om ”Kulub minus vepsläine sana” / ”Звучит во мне слово вепсское”.
Valentina Vasiljevna om sündunu Piterin agjan Mäggär’-külähä, vepsläižehe kanzaha. Mam radoi kolhozas. Val’ad kazvati baboi Jevdokia Ivanovna Bulatova.
Külän akad paksus keradelihe heiden pert’he besedoile, ken kudoi, ken kezerzi. Pen’ Val’aine kundli heiden paginoid, sarnoid, pajoid da elon azjoid. Val’a äjan küzeli babal, i se surel tahtol starinoiči vunukale külän polhe, kut ende eletihe, kanzan istorijad. Baboi otli neičukaižen pühile praznikoile, kus pühitadihe vet da kül’bihe, a jäl’ghe käveltihe kaumoile.
Valentina zavodi kirjutada runoid vepsän kelel völ norudes. Vodel 2012 om paindud Valentina Lebedevan ezmäine vepsänkeline kirj ”Lendi linduine”, kuna mülüiba starinad da runod. Toižiden Valentina Lebedevan kirjoiden keskes oma ”Удивительный народ”, ”Вепсы деревни Мягозеро — Панфилки из Мышкина”, ”Вепсы. Этнографические заметки”, ”Энциклопедия вепсской деревни” da ”Вепсская кухня”. Kaik nened kirjoid voib nähta ozutelusel. Mugažo sigä voib löuta avtoran kodiröunan istorijan töid da hänen runoid i starinoid, miččed mülüiba ”Живой родник” -al’manahaze da ”Север”-kulehtesehe.
Valentina Lebedevan mirun el’genduz om vepsläine, hänele oma mel’he ičeze rahvahan kul’tur, verod, ičeze kodikel’.
— Tahtoin, miše vepsläižed pagižižiba kelel, ei unohtaižigoi sidä. Meletan, miše vepsän kelel linneb tulii aig, konz toižed-ki tugedaba sidä, lämäl südäimel käraudasoiš ičeze kodiman kel’he. Ved’ se om mugoine läm’ da laskav, sanub Valentina Vasiljevna.
Nügüd’ Valentina eläb Kurb-küläs, kus eli hänen mam. Hän radab nügüd’-ki: kirjutab, keradab materialoid.
Ozutelusele voib tulda keväz’kun lophusai.