Šoutjärven muzejan jubileipäiväl mäneb ”Taidehö”
”Taidehö”-akcii jo tuli huväks tradicijaks Šoutjärven vepsläižes etnografižes muzejas. Täl kerdal se omištadihe Šoutjärven muzejan 55-voččele jubilejale.
Muzei adivoiden täht avaitas ehtal. Programmaha mülüba melentartuižed azjad kut lapsile, muga vanhembile-ki. Kaikid penembiden lapsiden täht tehtas fol’klorvastuz, kus starinoitas päčin polhe, sen znamoičendan polhe vepsläižil da toižil rahvahil. Aigvoččile da vanhembile lapsile muzejan pämez’ Natalja Anhimova tegeb Loninan urokan.
— Necil jubileivodel minä vedän mugomid urokoid muzejas i olen ihastusiš, miše sijaližed eläjad da openikad tedaba hänen polhe. Minei om tärged starinoita hänen polhe kut muzejan augonpanijan polhe, no sil-žo aigal avaita uzid hänen elon polid, hän oli völ kirjutajan, korrespondentan ”Prionežje”- da ”Kodima”-lehtesiš, sanub Natalja Anhimova.
Tradicijan mödhe akcii lopiše sädaivastusel, kus tulnuzid ristitud voiba ozutada ičeze lahjavut – starinoita runon, pajatada pajon vai kargeita.
