Opendajad jagoihe ičeze openduzpraktikoil da radonmahtištol kodikeliden kaičendas
Moskvas mäni Venäman rahvahiden kodikeliden opendajiden suim. Sille kerazihe enamba 280 mest 27 Venäman regionaspäi. Suimaha ühtniba vepsän-ki kelen opendajad Karjalaspäi da Vologdan agjaspäi.
Kaikenvenäman kodikeliden opendajiden suiman ühtnikad pagižiba kodikeliden opendamižen da radon erigoičusiden polhe nügüdläižes aigas. Opendajad erazvuiččiš regionoišpäi jagoihe ičeze openduzpraktikoil, radonmahtištol kodikeliden kaičendas. Mastar’-klassoil opendajad ozutiba uzid tehnologijoid, miččid kävutaba kodikelen opendamižes.
Šokšun školan vepsän kelen opendai Gleb Fomin aktivižesti jurdutab innovacijoid openduzprocessaha, kaiken udištab sidä, miše lapsile oliži melentartuižemb opeta vepsän kel’t. ”Vändtehnologijad vepsän kelen urokoil”-mastar’-klassal hän ozuti Venäman rahvahiden kodikeliden opendamižen nügüd’aigaližid, sidä kesken Internet-tehnologijoid.
— Minei tuli mel’he forum, oli lujas melentartušt nägištada toižiden opendajiden mahtišton. Sadud tedoid minä otan radoho, kävutaškanden ičein urokoil. Mugažo olin ihastusiš ozutada ičein openduzmaterialoid. Nadeimoiš, miše ned kožuba meile ühtesradnikoile, sanui Gleb Fomin.
Mugoine suim tehtihe ezmäižen kerdan. Sen tegii om Venäman openduzministerstv. Suiman satusen linneb ühtnikoiden ezitusiden elektronine kogomuz.
