Opaššušvuosi alko kielikurssiloilla
Karjalan kielen kaikkien murtehien šekä vepšän ta šuomen kielen kurššit alettih kieliresurssikeškukšešša. Joka ryhmäššä vietetäh oppituntija kerran netälissä.
— Tänä vuotena myö šaima 163 kirjutušta. Ryhmissä on kakši kertua enemmän rahvašta, kuin viime vuotena. Niise myö šaima uuvven lyydin kielen opaštajan — Marija Kočerinan, šelitti kielikeškukšen spesialisti Alina Kartinen.
Marija Kočerina on alottelijaryhmän opaštaja, a jatkokurššilla entiselläh opaštau Ljudmila Aleksejeva. Nuorempi opaštaja piti enšimmäisen tunnin viime šuovattana ta koroštau, jotta ryhmäššä oli oikein lämmin ilmapiiri.
— Mie hyvin tiijän vepšän kieltä, a lyydin kieli muissuttau vepšyä. Tahon iče opaštuo šyvempäh lyydin kieleh ta paraš keino on opaštua šitä. Kurššiloilla annan enemmän huomijuo pakinaharjotukšilla, šano lyydin kielen kurššien opaštaja Marija Kočerina.
Toiset kurššien opaštajat ollah entiset: vepšyä opaštau Marija Šašina, šuomie — Tatjana Islamajeva ta Tatjana Morozova, livvinkarjalua — Tatjana Baranova, vienua — Uljana Tikkanen.
