Karjalan- ta vepšänkielisen šanelun järještäjät ta ošallistujat täyttä voimua valmistauvutah aktijoh. Ošallistujilla on vielä riittäväšti aikua, jotta toistua šanaštuo, kielioppie, šanojen kirjuttamisen šiäntöjä, a järještäjillä – jotta valmistautuo aktijoh ta viettyä šitä, kuin enneinki korkietašosešti.
Aktijon järještäjänä on Karjalan kanšallisen ta alovehellisen politiikan ministerijö, šen spesialisti Aleksandra Anufrijeva kerto muutoma šalaisuš tämän vuuvven aktijošta.
— Petroskoissa šanelun keškikentällä tekstie ruvetah lukomah Ministerijön ruatajat: livviksi tekstie lukou kantakanšojen valtijollisen kannattukšen ta kanšalaisjärještöjen kera yhteisruavon ošašton johtaja Jelena Migunova, vepšäkši – šaman ošašton spesialisti Ol’ga Sobolenko. Lisyän, jotta täkši päiväkši tekstit on jo valittu, tovissukšet ta nimilaput on lähetetty šanelun kentillä, šanelun tekstien lukomisen videot ruvettih kuvuamah Karjalan TV-yhtijön studijošša, kerto Aleksandra Anufrijeva.
Kuluja vuosi on ilmotettu opaštajan ta juohattajan vuuvvekši, šentäh šanelun tekstien teema on šama. Aktijon ošallistujat ruvetah kirjuttamah pätkie kertomukšista, kumpaset kerrotah koulutuntiloilla tapahtunuista tapahukšista, muisselmista opaštajista ta kouluajoista. Šanelun kielinä ta murtehina ollah vepšä, livvin-, lyydin-, tverin- ta vienankarjala.
Karjalašša, Leningradin, Tverin ta Vologdan alovehella järješšetäh 75 šanelun kenttyä, niihi vuotetah yli 1200 ošallistujie. Kaikki tiijot aktijošta šuatta Šanelun Vkontakte-ryhmäštä.