Omamualazet suadih korgiet palkindot
Kanzan yhtenäžyön päiviä vaste Karjalan piämies palkičči Karjalan eläjii korgieloil arvomerkilöil. Kunnivonimet, ordenat, medalit da arvomerkit suadih opastajat, liäkärit, tiedo-, kul’tuuru da sportualoin edustajat, tevolližuos da muatalovuos ruadajat.
Ven’an prezidentan käskyn mugah Roditel’skaja slava -ordenan medalil on palkittu petroskoilazien Mel’nikovien pereh, kuduas on nelli lastu.
Ven’an prezidentan käskys Kunnivon ordenan on suannuh tiedomies Jevgenii Ieško, kudai enämbän puoldu sadua vuottu ruadau Karjalan tiedokeskukses.
Tavazallan korgeviman palkindon — Sammon ordenan on suannuh Karelstroimehanizatsija -laitos, kudai rakendau Karjalas äijän sotsiualuobjektua. Sammon ordenal on merkitty Petroskoin valdivonyliopiston filolougien instituutan laitoksen piälikkö Vladimir Zaharov.
— Konzu lopin školan, tahtoin mennä opastumah Leningruadah libo Moskovah. Ga ellendin, ku meijän yliopisto on paras. Jo 60 vuottu opastun, opastan da tahtozin uskuo, ku ielleh voin sidä ruadua, sanoi pruazniekkuivietos Vladimir Nikolajevič.
Medalil ”Arvotegolois Karjalan tazavallan hyväkse” on merkitty Mägriän souhozu, kudai on Karjalan parahii.
Yhty Oman Median kanualah Telegramas!
