Nuorižo: abuu ammattii vallites
Karjalas algavui uuzi nuorižole tarkoitettu projektu ”Maršruttu on vallittu! Elä, opastu da rua Karjalas!” Sidä todevutetah kanzallizen Kadrat-projektan mugah da sen avul nuoril rodieu kebjiembi vallita ruadotaival opastundan loppiettuu.
Projektan enzimäzenny pivonnu rodih Petroskoin autotransportan tehnikuman opastujien vastavus Petroskoin Kadrukeskukses.
Nuorii opastettih, kui ruadopraktiekan aigah käskiettylöi ruadoloi ruadajes suittua neruo, ku ruatuttajat rakkahal otettas ruadoh.
— Midä aijemba nuori ristikanzu rubieu ruadamah sidä, mih opastui, sidä pitkembäle häi piäzöy ruadotaivaldu myöte astujes. Myö luajimmo moizen sistieman, kuduas jogahine studentu jo opastundan aigah suau harjavuo tulieh ruadokohtah, ruatuttai suau vallita pädevembii da ruadoh rakkahii opastujii. Tazavallan ekonoumiekku tuloksennu suau valmistetut kadrat, nuoret — lyhyömbän dorogan ammattih, sanoi Karjalan piämiehen lehtistöpalvelule ruavonhaldivon varapiämies Jurii Borisov.
Projektah yhtyjes nuoril pidäy kirjuttuakseh saital ”Rabota v Rossii”, andua zajavleenii da tulla kadrukeskukseh eländykohtan mugah.
Yhty Oman Median kanualah Telegramas!
