Niken ei ole unohtettu: uuzi fil’mu kerdou Ižänmuallizes voinas
Nuoret aktivistat Kanzallizen da alovehellizen poliitiekan ministerstvan kannatuksel todevutetah projektua, kuduan mugah luajitah lyhyzii videoloi. Net kerrotah Karjalan histourieh nähte Ižänmuallizen voinan aigah.
Urho — voiton tropil -projektan hantuzis on valmistettu toine video. Uuzi fil’mu on omistettu Anuksen piirile da sen puolistajile. Viktor Leselidzen urhotego on huomivon keskes.
Uvven lyhytfil’man kačottuu suau tiijustua, kui eri kanzua olijat soldatat yhtes torattih vihaniekoinke. Uuzi video andau mahton uudeh luaduh nähtä voinua: se ei ole vaigu päivien da tapahtumien luvettelu, se on omua muadu suvaiččijoin da puolistajien ristikanzoin elaigu.
— Videon piähengen Urho-nimellizen brihačun silmil, kudaman died’oi oli karjalaine partizuanu, videon kaččonuh lapsi suau tundie sugupolvien yhtevytty da ellendiä, gu urhomiehet ei olla legendoin henget, hyö ollah meijän mual elänyöt rahvas, kudamat pellastettih meijän alovehen vihaniekois, on sanottu Karjalan tazavallan kanzallizen da alovehellizen poliitiekan ministerstvan VK-sivul.
Mieli luadie videoseerien Karjalan puolistajien mustokse juohtui EtnoSMART-nuorižofourumas. Projektan alguhpanijat uskottih, gu nämmät videot ollah ižänmuansuvaiččemizen opastamizen tärgiennu ozannu. Projektan piätavoiteh on ozuttua tovellizien ristikanzoin jygiedy ozua.
Projektan toine video voibi kaččuo Kanzallizen da alovehellizen poliitiekan ministerstvan Vkontakte-sivul. Enzimäine projektan video kerdou Belomorskas, kudai voinan aigah oli Karjalan piälinnannu. Kaikkiedah seeries on kolme videodu. Projektua kannattau Kanzallizen da alovehellizen poliitiekan ministerstvu.
Aihies voit lugie vepsäksegi.
Yhty Oman Median kanualah Telegramas!
